Landsréttur hefur staðfest gæsluvarðahaldsúrskurð héraðsdóms yfir manni sem grunaður er um að hafa orðið Tómasi Waagfjörð að bana á Ólafsfirði þann 3. október síðastliðinn.
Athyglisverð atriði koma fram í úrskurðum Landsréttar og héraðdóms um gæsluvarðhald yfir manninum. Þannig segir að gögn málsins beri með sér að hinn látni hafi átt upptökin að átökunum og veist að hinum grunaða með hnífi og stungið hann í andlit og læri.
Í úrskurði héraðsdóms er ekki fallist á að skilyrðum laga um „sterkan grun“ hafi verið fullnægt. Er gæsluvarðhaldið ekki samþykkt á forsendum rannsóknarhagsmuna heldur vegna þess að hætta sé á því að maðurinn brjóti af sér aftur. Er það byggt á því að samtals eru sex mál gegn manninum núna í rannsókn, fimm fyrir utan andlát Tómasar Waagfjörð. Í úrskurði Landsréttar segir:
„Samkvæmt sakavottorði varnaraðila var honum veitt reynslulausn 15. mars 2022 í tvö ár á eftirstöðvum 220 daga fangelsisrefsingar. Í greinargerð sóknaraðila er vísað til nokkurra mála sem lögreglustjóri segir varnaraðila eiga aðild að og upp hafi komið eftir að honum var veitt reynslulausn. Þannig vísar sóknaraðili til lögreglumáls nr. 008-2022-[…] þar sem varnaraðila er gefið að sök húsbrot og eignaspjöll 12. júlí 2022. Lögreglustjóri vísar einnig til máls lögreglu nr. 008-2022-[…] frá 5. júlí 2022 þar sem varnaraðili er grunaður um aðild að innflutningi fíkniefna. Í máli lögreglu nr. 008-2022-[…] frá 6. september síðastliðnum er varnaraðili grunaður um rán, frelsissviptingu, eignaspjöll, líkamsrárás og þjófnað. Þá hefur lögregla, svo sem áður var vikið að, til rannsóknar lögreglumál nr. 0316-2022-[…] er varðar ætlað manndráp.“
Maðurinn hefur verið úrskurðaður í gæsluvarðhald til 7. nóvember, en ekki á grundvelli rannsóknarhagsmuna heldur almannahagsmuna, þ.e. talin er hætta á að hann brjóti af sér aftur ef hann gengur laus.
Úrskurði héraðsdóms og Landréttar má lesa hér
