Sergei Aksyonov, héraðsstjóri á Krímskaga, segir að árásin á Kerch brúna á laugardaginn hafi kveikt þörf fyrir „hefnd“. Brúin skemmdist mikið í sprengingu á laugardaginn. Hún er mjög mikilvæg fyrir flutning á hergögnum og nauðsynjum til Krím og suðurhluta þess svæðis sem Rússar hafa hertekið í Úkraínu.  Brúin hefur einnig mikið táknrænt gildi fyrir Rússa og árásin á hana var þungt högg fyrir þá.

Vladímír Pútín, Rússlandsforseti, hafði sjálfur yfirumsjón með gerð brúarinnar, sem er sú lengsta í Evrópu. Hún var tekin í notkun 2018.

Þegar Aksyonov ræddi við fréttamenn eftir sprenginguna sagði hann að „staðan væri viðráðanleg, óþægileg, en ekki banvæn“. „Auðvitað hefur þetta vakið tilfinningar og það er heilbrigð löngun til að leita hefnda,“ sagði hann.

Enginn hefur lýst yfir ábyrgð á árásinni sem varð þremur að bana og olli miklu tjóni á brúnni.