Pawel Bartoszek, þingmaður Viðreisnar, furðar sig á að Miðflokkurinn í Kópavogi kvarti yfir því að fjölmiðlar spyrji um stefnumál hans. Miðflokkurinn hefur barist gegn flöggun regnbogafánans við skóla í bænum.
„Miðflokkurinn birtir TikTok myndband þar sem hann biður fólk um að setja like ef það vill bara sjá íslenska fánann við grunnskóla (og taka þá niður regnbogafánann sýndur er í mynd),“ segir Pawel í færslu á samfélagsmiðlum.
Vísar hann svo í pallborðsumræður hjá Vísi þar sem oddvitinn Einar Jóhannes Guðnason átti í vök að verjast þegar hann var inntur um þessa stefnu. Í umræðunum dróg hann í land og sagði að flokkurinn vildi ekki aðeins að íslenska fánanum yrði flaggað heldur mættu skólar flagga til dæmis fána sveitarfélagsins eða skólafánanum.
Fór hann í mikla vörn og sagðist ekki skilja hvers vegna væri verið að ræða þetta mál til jafns við leikskólamálin og skipulagsmálin sem dæmi.
„Miðflokkurinn er mjög hissa að fjölmiðlar vilji ræða þetta stefnumál þeirra. Meiri ofsóknirnar. Own it, Miðflokkur,“ segir Pawel í hæðnistón.
Miðflokkurinn birti hið umdeilda myndband um miðjan síðasta mánuð í kjölfar þess að varaformaður flokksins, Snorri Másson, réðist að regnbogafánanum í ræðu á Alþingi.
„Ef þú vilt frekar sjá íslenska fánann við skóla í Kópavogi settu þá like á þetta vídjó og kjóstu Miðflokkinn 16. maí,“ segir Einar í myndbandinu sem augljóslega var beint gegn regnbogafánanum. „Við í Miðflokknum viljum að það sé stefna í Kópavogi að einungis íslenski fáninn sem að flaggi við stofnanir. Þetta þarf ekki að vera flókið. Burt með vókið,“ sagði hann.
