Drengir sem beita einelti í skólum í Singapúr munu verða hýddir með priki. Það sam á við þá sem beita einelti á netinu.
Breska blaðið The Independent greinir frá þessum nýju reglum í skólum Singapúr.
Hýðingar eru alls ekki framandi refsing í borgríkinu. Er algengt að karlmenn yngri en 50 séu hýddir fyrir alls kyns glæpi, allt að 24 sinnum. Lögin heimila hýðingar kvenna einnig. Hafa hýðingar oft verið harðlega gagnrýndar af alþjóðlegum mannréttindasamtökum.
Í reglunum, sem menntamálaráðuneyti Singapúr, kynnti í vikunni má hýða drengi, 9 ára og eldri, allt að þrisvar sinnum ef þeir eru fundnir sekir um að beita einelti í skólum. Að sögn Desmond Lee, menntamálaráðherra, verður úrræðið þó aðeins notað til þrautavara.
„Það verður farið eftir ströngum reglum til að tryggja öryggi nemenda. Hýðingarnar verða að vera samþykktar af skólastjóra og aðeins þar til bærir kennarar mega beita þeim,“ segir Lee.
Eiga hýðingarnar að fá þann sem beitir einelti að læra af mistökum sínum og skilja alvarleika málsins. Eftirfylgni verður beitt til þess að sjá hvernig nemandinn bregst við. Verður honum boðin ráðgjöf eftir hýðinguna.
Stúlkur sem beita einelti verða ekki hýddar en þær munu fá annars konar refsingar. Svo sem eftirsetu í skólanum eða brottvísun.
