Það eru eflaust fá börn sem dreymir um að verða ráðuneytisstjórar þegar þau verða stór en ef þau vissu af launatékkanum sem fylgir starfinu þá myndu ábyggilega einhver þeirra setja stefnuna beinustu leið þangað. Ráðuneytisstjórarnir áttu ekki erfitt með að ná endum saman árið 2021 þar sem mánaðarlaun þeirra, sem úttekt DV náði til, voru frá 1,7 og upp í tæpar 1,9 milljónir króna.

Eftir að hafa séð þessi laun eru án efa einhver börn þarna úti sem ætla sér að fara í nám í stjórnun til að verða ráðuneytisstjórar þrátt fyrir að þau viti kannski ekkert hvað ráðuneytisstjórar gera. Til að einfalda málið fyrir börnin (og allt hitt fólkið sem hefur ekki hugmynd um hvað ráðuneytisstjórar gera) þá stýra ráðuneytisstjórar ráðuneytum undir yfirstjórn ráðherra. Völd þeirra eru því mikil í samfélaginu og launatékkinn endurspeglar það augljóslega.

En ráðuneytisstjórarnir voru ekki allir með nákvæmlega sömu mánaðarlaunin árið 2021. Guðmundur Árnason, ráðuneytisstjóri fjármála og efnahagsráðuneytisins, trónir á toppnum meðal kollega sína með tæpar 1,9 milljónir á mánuði. Ragnhildur Hjaltadóttir,  ráðuneytisstjóri Innviðaráðuneytisins, fylgir honum fast á eftir með 1,85 milljónir á mánði og Bryndís Hlöðversdóttir, ráðuneytisstjóri forsætisráðuneytisins, er svo næst í röðinni með um 1,84 milljónir á mánuði.

Neðst á listanum er Ásdís Halla Bragadóttir en hún var með 941 þúsund í mánaðarlaun árið 2021. Ástæðan fyrir því að Ásdís er með svona miklu lægri laun en hinir er ekki sú að hún er léleg í að semja um laun heldur varð hún ekki ráðuneytisstjóri fyrr en í apríl á þessu ári. Með nýja starfinu eru laun Ásdísar því búin að tvöfaldast frá því í fyrra.