Einar Kárason, rithöfundur og fyrrverandi varaþingmaður Samfylkingarinnar, fer gagnrýnum orðum um Sósíalistaflokkinn í pistli á Facebook í dag. Telur hann að kjósendur þurfi að fá skýrari upplýsingar um hvort flokkurinn sé alfarið á móti einkareknum atvinnulífi eða ekki. Bendir hann á að margir flokkar í Evrópu skilgreini sig sem sósíalista en séu síður en svo á móti frjálsu atvinnulífi.

Það sem vekur þessa spurningu í huga Einars eru yfirlýsingar frambjóðenda sósíalista um að þeir séu á móti kapítalisma:

„Nú er Sósíalistaflokkurinn að birta framboðslista og þar birtist fólk með yfirlýsingar um að það sé sósíalisti og „á móti kapítalisma.“ Svo ég held að flokkurinn verði að fara að skilgreina betur stefnu sína. Það eru til stórir flokkar í Evrópu og víðar sem heita sósíalistaflokkar en eru bara hefðbundnir jafnaðarmenn, t.d. í Frakklandi eða Spáni. Og jafnaðarmenn, sósíaldemókratar eru ekki á móti einkarekstri eða frjálsu atvinnulífi, semsagt kapítalisma. Sænskir kratar byggðu til dæmis upp velferðarkerfið með því að láta einkarekið atvinnulíf draga vagninn, framleiða verðmætin, en ríkið jafna kjörin. Sé íslenski sósíalistaflokkurinn á móti kapítalisma þá væri kannski nær að hann kallaði sig kommúnistaflokk – þannig flokkar náðu völdum hér og þar, bönnuðu einkarekstur, kapítalisma, þannig að allt atvinnulíf var ríkisrekið með tilheyrandi skrifræði, stofnanaþunga og óskilvirkni. Þetta var í austur Evrópu og víðar, og eiga ekki kjósendur rétt á að vita hvert framboðin stefna?“