Á mánudaginn fundust sex manns úr sömu fjölskyldu látnir á heimili fjölskyldunnar í Allen í Texas. Lögreglan telur að bræðurnir Tanvir Towhid, 21 árs, og Farhan Towhid, 19 ára, hafi myrt fjóra ættingja sína og síðan framið sjálfsvíg.

Sky News skýrir frá þessu. Haft er eftir talsmanni lögreglunnar að annar bróðirinn hafi skrifað langa færslu á samfélagsmiðla um að þeir bræðurnir hefðu í hyggju að myrða foreldra sína, systur og ömmu áður en þeir myndu taka eigið líf. Hann skrifaði einnig að ákvörðun þeirra hefði verið tekin eftir að þeir hefðu vegið „kosti hennar og galla“.

Það voru lögreglumenn sem fundu líkin.

Hin látnu eru Altafun Nessa, 77 ára, Iren Islam, 56 ára, Towhidul Islam, 54 ára, og Farbin Towhid, 19 ára, en hún var tvíburasystir Farhan.