Tvö af ástsælustu morgunkornum okkar Íslendinga munu nú hverfa úr hillum verslana. Um jólin tóku margir eftir því að ekki var hægt að fá Lucky Charms í verslunum lengur og sögðu Nathan & Olsen, umboðsaðilar General Mills á Íslandi sem framleiðir morgunkornið, að það væri „smá brekka í þessu og óvíst um framhaldið.“ Nú er það orðið ljóst að það mun ekki snúa aftur.

General Mills hefur nýlega upplýst Nathan & Olsen um að vörumerkin Cocoa Puffs og Lucky Charms séu ekki lengur í boði fyrir íslenskan markað. Þetta kemur til vegna breytinga á uppskrift sem felur í sér viðbætt náttúrulegt litarefni sem samræmist ekki evrópulöggjöf sem gildir á Evrópska efnahagssvæðinu.

„Þetta er auðvitað mjög leiðinlegt fyrir okkur og íslenska neytendur,“ segir Lísa Björk Óskarsdóttir, framkvæmdastjóri Nathan & Olsen. „Bæði Cocoa Puffs og Lucky Charms hafa átt fastan sess á heimilum landsmanna um áratuga skeið og notið mikilla vinsælda fólks á öllum aldri. Þessar vörur, ásamt ýmsum öðrum frá Bandaríkjunum, eru eftirsóttar á Íslandi en hér hefur verið innleidd evrópulöggjöf sem getur verið hamlandi þegar kemur að því að bjóða neytendum fjölbreytt úrval af bandarískum vörum.

Í tilkynningu frá General Mills segir framleiðandinn meðal annars að unnið sé hörðum höndum að því að þróa aðrar lausnir í framleiðslu á vörum fyrir Evrópumarkað sem þjónað geti íslenskum neytendum með sama ánægjulega hætti og verið hefur til þessa.