Bæjarstjórn Grindavíkur boðar til opins íbúafundar í dag, miðvikudaginn 22. apríl kl. 16:30, í Gjánni, „einum mikilvægasta íbúafundi í sögu bæjarins. Þar á að ræða framtíð samfélags sem hefur verið sett á hliðina, samfélags sem hefur lifað í óvissu mánuðum saman og beðið eftir svörum sem virðast ekki koma,“
segir Dagmar Valsdóttir eigandi Grindavík Guesthouse & Kvika Travel ehf. í grein sinni á Vísi.
Segir hún það óásættanlegt að forsætisráðherra, Kristrún Frostadóttir, sjái sér ekki fært að mæta. „Þetta er ekki formsatriði. Þetta er ekki valkvætt. Þetta er próf á forgangsröðun.“
Segir Dagmar að fyrir Alþingiskosningar voru gefin loforð um að hlusta á fólk, vera í samtali og standa með þeim sem þurfa mest á því að halda. Nú reyni á þau orð.
„Og því miður blasir við mynd sem vekur upp alvarlegar spurningar um hvort Grindavík skipti raunverulega máli í huga stjórnvalda. Á meðan bíða íbúar. Bæjarfélag sem hefur gengið í gegnum náttúruhamfarir, rýmingu og djúpa óvissu situr eftir án svara. Án samtals. Án þess að upplifa að það sé hlustað.“
Segir Dagmar, Járngerði sem er félag íbúa í Grindavík, hafa reynt ítrekað í meira en tvo mánuði að ná sambandi við forsætisráðherra, bæði í gegnum síma og tölvupóst. Engin svör hafi borist.
„Hvað þarf að gerast til að samfélag á Íslandi fái raunverulega athygli stjórnvalda? Hversu langt þurfa íbúar að ganga áður en rödd þeirra er tekin alvarlega? Þetta snýst ekki um kurteisi eða dagskrárlið. Þetta snýst um virðingu. Virðingu fyrir fólki sem hefur misst öryggi sitt, heimili sitt og framtíðarsýn sína tímabundið eða jafnvel varanlega. Ef stjórnvöld mæta ekki þegar mest á reynir, hvenær mæta þau þá?“
Dagmar biðlar til þeirra sem fylgjast með utan Grindavíkur að setja sig í spor íbúanna.
„Ef þetta væri ykkar samfélag, ykkar fjölskyldur, ykkar framtíð mynduð þið sætta ykkur við þögnina?“
Fundinum verður streymt, en þeir sem hafa tök á hvattir til að mæta á staðinn. „Það skiptir máli fyrir umræðuna að fá fólk í salinn og að þingmenn heyri raddir Grindvíkinga beint.“
Í auglýsingu um fundinn sem birt var kl. 9.25 þriðjudagsmorgun segir að Sigurður Ingi Jóhannsson Framsóknarflokki, Vilhjálmur Árnason Sjálfstæðisflokki og Sandra Sigurðardóttir Viðreisn (með fyrirvara um þinghald) hafi staðfest komu sína.
Enginn þingmaður frá Flokki fólksins, Miðflokknum og Samfylkingunni hefur boðað komu sína. Forsætisráðherra, Kristrún Frostadóttir, hefur tilkynnt að hún muni ekki mæta á fundinn en hefur boðið að senda ráðuneytisstjóra í forsætisráðuneytinu í sinn stað. Ekki hefur borist formlegt svar frá Fasteignafélaginu Þórkötlu varðandi mætingu á fundinn.
