Bretum hefur gengið vel að bólusetja þjóðina gegn kórónuveirunni enda hafa þeir haft úr miklu magni bóluefna að moða. En nú stefnir í að hægjast muni á ferlinu frá og með 29. mars. Samkvæmt fréttum breskra fjölmiðla þá munu framleiðendur bóluefnanna ekki geta afhent eins mikið magn af þeim og áður.

Þetta er sama vandamálið og ESB hefur staðið frammi fyrir. Í bréfi sem bresk heilbrigðisyfirvöld sendu til starfsstöðva sinna um allt land kemur fram að reikna megi með að verulega muni hægja á afhendingu bóluefna frá og með 29. mars.

Matt Hancok, heilbrigðisráðherra, segir að nú sé búið að gefa 25 milljónum landsmanna að minnsta kosti einn skammt af bóluefni.

Yfirvofandi tafir munu hægja á gangi bólusetninga og munu aðallega bitna á fólki yngra en fimmtugu. Í fyrrnefndu bréfi kemur fram að nota eigi þá skammta sem berast frá og með 29. mars til að gefa þeim seinni skammtinn sem hafa nú þegar fengið fyrri skammtinn.