Það voru vísindamenn við University of Sydney og University of Roehampton í Lundúnum sem gerðu rannsóknina. The Guardian skýrði frá þessu. Fram kemur að vísindamennirnir hafi lagt „óleysanlega þraut“ fyrir kengúrur. Í henni fólst að matur var inni í kassa sem þær gátu ekki opnað. Alexandra Green, einn af höfundum rannsóknarinnar, sagði að í stað þess að gefast upp hafi stór meirihluti kengúranna litið á vísindamanninn og aftur á kassann, hreyfing sem var túlkuð sem beiðni um hjálp. „Sumar þeirra gengu meira að segja að honum og byrjuðu að klóra og þefa af honum og líta síðan á kassann, svo þær voru í raun að reyna að eiga í samskiptum við hann,“ er haft eftir Green.
Svipuð hegðun hefur sést hjá öðrum dýrum þegar þau biðja fólk um hjálp en Alan McElligott, aðalhöfundur rannsóknarinnar, sagði að almennt ætti þetta bara við um dýr sem fólk hefur haldið sem húsdýr öldum saman. „Kengúrur sýndu sama hegðunarmynstur og við höfum séð hjá hundum, hestum og jafnvel geitum sem hafa fengið sama próf,“ sagði hann.
Hann sagði að þetta styðji við hugmyndir um að hvaða dýr sem er geti lært að eiga í samskiptum við aðrar tegundir ef það býr yfir nægilega öflugri heilastarfsemi.
