Það getur greinilega verið arðbært að stunda bréfdúfnarækt ef vel gengur. Að minnsta kosti hefur Belginn Kurt Van de Wouwer gert það gott en í gær seldist bréfdúfa hans, New Kim, fyrir sem svarar til um 260 milljóna íslenskra króna á uppboði.

BBC skýrir frá þessu. New Kim er kvenfugl og var upphafsboðið sem svarar til 31.000 íslenskra króna. En þá hófst barátta tveggja Kínverja um New Kim. Kurt Van de Wouwer sagði Reuters að fjölskyldan hafi fengið „áfall“ þegar hún fékk fréttina um söluverðið.

Það kemur einnig að sögn á óvart að nú sé það kvenfugl sem á metið sem dýrasta bréfdúfa sögunnar. „Þetta metverð er óskiljanlegt því þetta er kvendýr. Venjulega eru það karldýrin sem eru meira virði því þau geta framleitt fleiri unga,“ sagði Nikolaas Gyselbrech hjá uppboðshúsinu Pipa sem sérhæfir sig í uppboðum á dúfum.

Fyrra metið átti dúfan Armando sem var seld fyrir sem svarar til um 195 milljóna íslenskra króna á síðasta ári. Armando er nú farinn á eftirlaun.

Reiknað er með að New Kim verði notuð til undaneldis á fleiri eldfljótum bréfdúfum í Kína. Bréfdúfur eru mjög vinsælar meðal efnaðra Kínverja sem hika greinilega ekki við að greiða háar fjárhæðir fyrir góðar dúfur.