Enska úrvalsdeildin fer aftur af stað 17 júní að öllu óbreyttu. Þetta var staðfest í fyrradag. Deildin fer af stað með leikjum Aston Villa gegn Sheffield United og stórleik Manchester City og Arsenal. Þetta eru leikir sem átti eftir að klára.

Heil umferð fer svo af stað 19 júní og verður leikið frá föstudegi til mánudags. Búið er að greina frá því að flestir leikir fari ekki fram á hlutlausum velli en hið minnsta sex leikir fara fram á hlutlausum velli samkvæmt enskum blöðum.

Lögreglan á Englandi óttast meðal annars að stuðningsmenn Liverpool hópist saman þegar liðið verður enskur meistari í fyrsta sinn í 30 ár.

„Þetta verður á tómum velli en þegar þetta gerist þá verður þetta magnað því við vitum að þið hugsið til okkar um allan heim,“ sagði Klopp.

,,Ég veit ekki á hvaða velli þetta verður en ég vona að þetta verði á Anfield, það er samt ekki það mikilvæga. Ég hef heyrt talað um hlutlausan völl en við getum leyst þetta hérna. Ég heyrði að við ættum bestu heima stuðningsmenn í heimi, við þurfum á því að halda að þið verðið heima.“