Albert Guðmundsson segist hafa átt í viðræðum við ítölsk stórlið áður en hann var kærður fyrir nauðgun 2023. Þá hafi félög dregið sig úr viðræðum.
Albert gekk í raðir Fiorentina sumarið 2024 frá Genoa, en bæði lið leika í Serie A á Ítalíu. Hann vakti mikla athygli fyrir frammistöðu sína með Genoa og vildu enn stærri félög fá hann á sínum tíma.
„Ári áður en ég fór til Fiorentina kemur málið upp og það bakka út lið þar,“ sagði Albert í viðtali við hlaðvarpið Chess After Dark.
Það var þá saumað að honum um hvaða félög var að ræða og upp úr krafsinu komu engin smá nöfn. „Það voru ýmiss lið en ég talaði örugglega mest við Inter og Juventus á þeim tíma,“ sagði Albert.
Albert, sem var á dögunum sýknaður, hefur verið lykilmaður fyrir Fiorentina síðan hann gekk í raðir félagsins.
