Fyrrverandi enski landsliðsmaðurinn Wayne Rooney segir að hann hafi fengið líflátshótanir þegar hann yfirgaf uppeldisfélag sitt Everton og gekk til liðs við Manchester United árið 2004.
Rooney var aðeins 18 ára gamall þegar hann skrifaði undir samning við United í 27 milljóna punda viðskiptum, eftir að hafa hafnað metsamningi frá Everton. Félagaskiptin ollu miklum usla í Liverpool-borg og leiddu til harðra viðbragða frá hluta stuðningsmanna Everton.
„Ég fékk líflátshótanir,“ sagði Rooney í nýjasta þætti The Wayne Rooney Show á BBC Sport. „
Húsið hjá foreldrum mínum var spreyjað og rúður brotnar. Sama gerðist hjá kærustunni minni á þeim tíma, sem er eiginkona mín í dag.“
Rooney segir að þetta hafi reynt verulega á andlega. „Þarna þarftu að vera andlega sterkur og fólkið í kringum þig þarf að styðja þig. Það var erfitt að fara, sérstaklega þar sem ég fór til Manchester United. Liverpool og Manchester eiga í mikilli samkeppni og það gerði hlutina enn flóknari.“
Hann segir þó að hann hafi alltaf vitað hvað hann vildi. „Ég var alltaf með það hugarfar að mér væri sama. Ég vissi hvert ég vildi fara og hvernig ég ætlaði mér þangað. Þetta var fólk úr minni eigin borg og það var erfitt, en stundum þarftu að vera eigingjarn og taka stórar ákvarðanir.“
