Grundarheimilin hafa sent frá sér nýja tilkynningu vegna tölvuárásar á heimilin fyrr í vikunni.

Árásin fólst í því að tölvuþrjótar brutust inn á netþjóna og komust þannig inn í kerfi þar sem finna má upplýsingar um skjólstæðinga, íbúa, aðstandendur og starfsfólk Grundarheimilanna.

Sjá einnig: Tölvuárás á Grundarheimilin

Í tilkynningu sem Grundarheimilin sendu frá sér nú í kvöld kemur fram að búið er að loka fyrir aðgang tölvuþrjótanna og ljóst þykir að engum gögnum eða upplýsingum hefur verið eytt eða þeim  breytt.

„Heimilin hafa áfram fullan aðgang að öllum upplýsingum sem kerfin innihalda og árásin hefur því takmörkuð áhrif haft á þá þjónustu sem heimilin veita íbúum og skjólstæðingum.“

Rannsókn hefur leitt í ljós að áður en að tölvuárásin uppgötvaðist, tókst tölvuþrjótunum að afrita hluta af þeim persónuupplýsingum sem finna mátti í kerfum heimilanna, s.s. heilsufarsupplýsingar sem tengjast umönnun og veittri heilbrigðisþjónustu á heimilunum.“

Ekkert bendir til þess að þessar upplýsingar hafi verið birtar og tölvuþrjótarnir hafa ekki hótað slíkri birtingu. Rannsókn árásarinnar stendur enn yfir með aðstoð færustu sérfræðinga landsins á þessu sviði.

„Í ljósi viðkvæms eðlis þessara upplýsinga eru skjólstæðingar, íbúar, aðstandendur og starfsmenn Grundar hvattir til að vera á varðbergi gagnvart mögulegri misnotkun á upplýsingunum af hálfu tölvuþrjótanna. Ef grunur vaknar um slíka misnotkun þá skal gæta fyllstu varúðar í samskiptum, bregðast ekki við heldur tilkynna það til CERT-IS netöryggissveitarinnar. Rétt er að árétta að Grundarheimilin munu ekki senda út neina pósta að fyrra bragði þar sem fólk er beðið um að senda upplýsingar eða ýta á hlekki.“

Tilkynnt hefur verið um árásina til Persónuverndar, Landlæknis og CERT-IS netöryggissveitarinnar í samræmi við það sem áskilið er í lögum og starfsleyfi heimilanna. Einnig er verið að undirbúa kæru til lögregluyfirvalda.

„Grundarheimilin munu ræða við alla íbúa og hafa verið sendar sérstakar tilkynningar til starfsfólks, skjólstæðinga, íbúa og  aðstandenda eftir því sem mögulegt er. Þá hefur fólki verið boðið að hafa samband beint með spurningar sem kunna að vakna.“