MLS-deildin í Bandaríkjunum hefur hafið áhlaup til að reyna að fá Mohamed Salah, lykilmann Liverpool, til að flytja vestur um haf og feta í fótspor Lionel Messi.
Framtíð Salah, sem er 33 ára, er óviss hjá Liverpool undir stjórn Arne Slot eftir sprengiviðtal þar sem Egyptinn sagðist hvorki eiga í neinu sambandi við knattspyrnustjórann né hafa fengið sanngjarna meðferð hjá félaginu.
Í kjölfarið var hann ekki í leikmannahópi Liverpool í sigri liðsins gegn Inter Mílanó og hafa vangaveltur um brottför hans aukist. Þrjú félög í Sádi-Arabíu hafa einnig sýnt honum áhuga.
Nú hefur yfirmaður MLS, Don Garber, blandað sér í umræðuna eftir að greint var frá áhuga San Diego og Chicago Fire.
„Ef Salah myndi einhvern tímann ákveða að koma til MLS myndum við taka á móti honum með opnum örmum,“ sagði Garber.
Hann hvatti Salah jafnframt til að tala við Lionel Messi og Thomas Müller um reynslu þeirra í deildinni og hversu vel þeim hafi liðið þar.
