Jónatan Guðni Arnarsson ungur leikmaður Norrköping í Svíþjóð er sagður á heimleið og er sagður funda með ansi mörgum áhugasömum félögum.

Jónatan er fæddur árið 2007 og spilaði tíu leiki í efstu deild Svíþjóðar í vetur þegar liðið féll úr deildinni.

„Strákur sem er fæddur árið 2007 og spilaði tíu leiki fyrir Norköpping, hann hefur ekkert heim að gera. Ég vona að það sé allt í lagi, hann má ekkert fara heim eftir þessa leiki með sænska liðinu,“ sagði Hjörvar Hafliðason í Dr. Football hlaðvarpinu í gær.

Gunnar Birgisson fréttamaður RÚV segir það letjandi umhverfi á Íslandi að kenna að ungir leikmenn komi heim.

„Ég skil þetta ekki, af hverju menn þrauka ekki lengur. Ég held að menn hljóti horfa í það hvað launaumhverfið hérna er algjörlega bilað. Þú þarft að koma þér fyrir í eitt tímabil og tvöfaldar eða þrefaldar þig í launum þegar þú kemur heim. Þetta er letjandi umhverfi.“

Jónatan Guðni lék með Fjölni áður en hann fór út.

„Það er mjög sérstakt að hann vilji koma heim, hann er að funda með liðum hérna. Hann virðist á heimleið, ef hann saknar pizzu hjá mömmu með Kjarnafæði pepperoni. Fáðu þér það núna í tvær vikur,“ sagði Hjörvar að lokum.