Í baráttunni við að lifa heimsfaraldur kórónuveirunnar af hefur bílaleigurisinn Hertz gripið til þess ráðs að segja rúmlega 10.000 starfsmönnum upp síðan í apríl. Í síðustu viku sótti fyrirtækið um gjaldþrotavernd í Bandaríkjunum en hún veitir fyrirtækinu skjól og gerir því kleift að endurskipuleggja reksturinn. En sumir starfsmenn virðast vera verðmætari en aðrir því skjöl sýna að fyrirtækið greiddi nú í maí fjölda yfirmanna milljónabónusa.

Fyrirtækið greiddi um 340 yfirmönnum 16,2 milljónir dollara, sem svarar til rúmlega tveggja milljarða íslenskra króna, í bónus sem er ætlað að fá þá til að halda áfram að starfa hjá fyrirtækinu.

Sú kvöð sem fylgir bónusgreiðslunum er að ef starfsmennirnir hætta hjá Hertz fyrir 31. mars á næsta ári, að eigin frumkvæði, þá verða þeir að endurgreiða hann.

Hertz er rúmlega 100 ára gamalt fyrirtæki og var með um 38.000 starfsmenn um allan heim á síðasta ári.