Kanadíski leikarinn Nick Cordero komst nýlega til meðvitundar eftir að hafa verið haldið sofandi vikum saman. Cordero, sem hefur meðal annars verið tilnefndur til Tony-verðlaunanna fyrir leik sinn, veiktist af COVID-19 í mars. Í byrjun apríl var hann svæfður vegna alvarleika sjúkdómsins og um miðjan mars neyddust læknar til að taka báða fótleggi hans af honum.

Eiginkona hans Amanda Kloots skýrði frá því á Instagram í gær að Cordero væri kominn til meðvitundar. Í færslu sinni sést hún tala til sonar síns og segja honum að pabbi sé vakandi en hann sé mjög veikburða og það krefjist mikillar orku að opna og loka augunum.

Hann á enn langt í land með að ná bata og er rétt farinn að geta brugðist við fyrirmælum lækna.

Læknar neyddust til að aflima hann vegna mikillar blóðsöfnunar í fótunum á meðan hann var í öndunarvél. Auk þess fékk hann hjartastopp og sveppasýkingu í lungun.

Kloots segist ekki vita hvar Cordero smitaðist en hann glímdi ekki við nein heilsufarsvandamál áður.

„Þetta leggst ekki bara á gamalt fólk. Þetta er raunveruleikinn. Algjörlega heilbrigður 41 árs maður.“

Sagði hún.