„Í gærkvöldi hélt ég símanum mínum svo eiginkona gæti rætt við manninn sinn á FaceTime þegar hann lést af völdum COVID. Hún talaði við hann eins og ekkert okkar hinna væri í stofunni og að þau væru að borða afmæliskvöldverð (í næsta mánuði). Hún sagði honum frá öllu því sem hún myndi sakna þegar hann væri farinn og þakkaði honum fyrir að vera besti eiginmaðurinn og faðirinn. Þrátt fyrir að hann gæti ekki svarað, sást í augum hans að hann þekkti rödd hennar. Ég hata þessa veiru. Ég hata að fjölskyldur verði að syrgja í einangrun.“

Þetta skrifaði bandaríski læknirinn Tanner Hulin nýlega á Facebooksíðu sína. Færslan lýsir vel þeim hryllingi sem fylgir COVID-19 veirunni og verður vonandi sem flestum hvatning til að fylgja fyrirmælum yfirvalda um hvernig á að hegða sér á meðan faraldurinn gengur yfir. Hann bætti síðan eftirfarandi texta við:

„Ég hef heyrt margar mismunandi skoðanir um COVID. Sumar byggjast á persónulegri reynslu en aðallega eru þetta sömu fréttatilkynningarnar og færslur á samfélagsmiðlum. Vinsamlegast hugsið um nágranna ykkar, vini og ættingja áður en þið lýsið skoðun ykkar. COVID er ekkert grín. Ég vona að það að halda sig heima sé að ykkar mati lágt verð fyrir að lágmarka þann fjölda fjölskyldna sem geta ekki haldið utan um ástvini sína þegar þeir deyja. Að það að halda sig heima sé lágt verð fyrir að vernda þá sem eru viðkvæmir. Að þú endurmetir þá skoðun þína að hlutirnir „séu blásnir upp og ýktir“. Ég get fullvissað þig um að það er fólk um allan heim sem finnst heimurinn standa kyrr einmitt núna. Þessar skoðanir hljóta að særa það mikið.“