Friður og ró, fallegustu baðstrendur heims þar sem hægt er að liggja undir pálmatrjám og njóta lífsins í botn. Þetta er sú mynd sem margir hafa af Kyrrahafseyjum. En margar þessara eyja standa nú frammi fyrir baráttu upp á líf og dauða.

Þetta segir Hilda Heine, forseti Marshalleyja. Á loftslagsráðstefnunni í Madrid bað hún heimsbyggðina um að koma Marshalleyjum til bjargar áður en það er um seinan.

„Viðkvæmustu eyríkin, eins og landið mitt, standa frammi fyrir baráttu upp á líf og dauða vegna hækkandi sjávarborðs og öflugra storma.“

Sagði hún á ráðstefnunni að sögn News.com.au.

Hún sakaði ríkisstjórnir, sem vilja ekki taka þátt í að draga úr losun CO2 út í andrúmsloftið strax á næsta ári, um að vera í raun að kveða upp dauðadóm yfir Marshalleyjum.

„Einmitt nú, á meðan við tölum hafa mörg hundruð af íbúum landsins okkar flúið heimili sín eftir að stórar öldur urðu til þess að sjór flæddi yfir hluta af höfuðborginni okkar í síðustu viku. Þetta er barátta upp á líf og dauða fyrir alla sem ekki vilja flýja. Sem þjóð neitum við að flýja en við neitum einnig að deyja.“

Marshalleyjarnar eru mitt á milli Filippseyja og Hawaii. Þær samanstanda af mörgum litlum eyjum sem eru aðeins nokkra metra yfir sjávarmáli.