„Er hann ekki bara venjulegur flokkur sem eltir tískubylgjur og er uppfullur af rétthugsun eins og allir aðrir flokkar og heldur að það sé að vera nútímalegur?“

Svo skrifar Brynjar Níelsson, þingmaður Sjálfstæðisflokksins, er hann brást við spurningu sem sett var á vegginn hans á Facebook, þar sem óskað er eftir skilgreiningu á Sjálfstæðisflokknum, hvort hann sé vinstri,-miðju,- eða hægriflokkur.

Brynjar er einn þeirra sem orðaðir voru við embætti dómsmálaráðherra, en það féll í hlut Áslaugar Örnu Sigurbjörnsdóttur. Eru þeir Brynjar og Páll Magnússon, sem einnig var orðaður við embættið, sagðir ósáttir við þann ráðhag, svo ekki sé dýpra tekið í árinni.

Sitt sýnist hverjum um skilgreininguna en sammælast flestir í athugasemdakerfinu um að flokkurinn sé á rangri leið og er hann til dæmis uppnefndur krataflokkur og er þriðji orkupakkinn og yfirvofandi vegtollar nefndir sem dæmi um hversu langt flokkurinn hefur farið af sporinu, en hann fékk aðeins rúmlega 18 prósenta fylgi í könnun MMR í síðustu mælingu, sem er minnsta fylgi frá upphafi mælinga.

Sjálfur reynir Brynjar að bera í bætifláka og segir:

„Það er nú samt þannig (…) að Sjálfstæðisflokkurinn er eini alvöru stjórnmálaflokkurinn í landinu.“