Mikið hefur verið um hrókeringar innan lögreglunnar en flestir þessara yfirstjórnenda voru fluttir úr einu embætti yfir í annað á grundvelli 36. greinar starfsmannalaga.
Stjórnvald, sem skipað hefur mann í embætti, getur flutt hann úr einu embætti í annað, enda heyri bæði embættin undir það. Enn fremur getur stjórnvald, sem skipað hefur mann í embætti, samþykkt að hann flytjist í annað embætti er lýtur öðru stjórnvaldi, enda óski það stjórnvald eftir því.
Greint er frá því í Stundinni að GRECO, samtök ríkja gegn spillingu, hafa gagnrýnt það ítrekað að „handvalið“ sé í stöður innan lögreglunnar á Íslandi.
Sigríður Björk Guðjónsdóttir, lögreglustjóri á höfuðborgarsvæðinu, sendi starfsmönnum lögreglunnar tölvupóst í vor, samkvæmt frétt Stundarinnar. Þar kom fram að búast mætti við ýmsum breytingum þegar kemur að yfirmannsstöðum innan lögreglunnar.
„Eins og þið þekkið eru breytingar og auglýsingar á yfirmannsstöðu, sérstaklega vel til þess fallnar að stuðla að óróleika hjá embættinu,“
Sigríður bætir því við að yfirstjórnin hefði „ákveðið að bíða með að festa stöður og setja frekar eða flytja í samræmi við starfsmannalög þar sem vantar tímabundið að losa álag, vinna betur með hverja einingu og fá reynslu á hvort viðkomandi breytingar skili þeim árangri sem að er stefnt.“
Ásgeir Þór Ásgeirsson – Yfirlögregluþjónn
Helgi Valberg Jensson – Aðallögfræðingur
Karl Steinar Valsson – Yfirlögregluþjónn
Sigríður Björk Guðjónsdóttir – Lögreglustjóri
Theodór Kristjánsson – Yfirlögregluþjónn
Stundin vekur athygli á því að það var Hanna Birna Kristjánsdóttir sem skipaði Sigríði Björk Guðmundsdóttur sem lögreglustjóra en Hanna var þá innanríkisráðherra. Málið vakti athygli þar sem staðan var ekki auglýst til umsóknar en Sigríður var flutt í embættið sem fyrr segir á grundvelli 36. greinar starfsmannalaga. Það vekur athygli að einn af þeim sem fengu yfirmannsstöðu hjá lögreglu án auglýsingar er Theodór Kristjánsson, bróðir Hönnu Birnu Kristjánsdóttur.
Þegar Sigríður Björk var skipuð lögreglustjóri á höfuðborgarsvæðinu stóð lekamálið sem hæst en síðar kom í ljós að Sigríður hafði, sem lögreglustjóri á Suðurnesjum, átt í samskiptum við aðstoðarmann ráðherra og sent honum trúnaðargögn um hælisleitendur. Sigríður upplýsti hvorki lögreglu né ákæruvaldið um samskipti sín við aðstoðarmanninn en upplýsingarnar hefðu getað komið rannsakendum að gagni. Í frétt Stundarinnar kemur fram að þetta hafi ollið óánægju innan lögreglu þar sem mörgum fannst það undarlegt að vera undirmenn einhvers sem hafði haldið upplýsingum leyndum fyrir lögreglu mánuðum saman.
