Facebook hlustaði á hljóðupptökur frá einum notanda hér á landi. Persónuvernd hér á landi hefur ákveðið að hefja frumkvæðisathugun vegna þessa öryggisbrests, að því er segir í tilkynningu frá Persónuvernd.

Greint var frá því á dögunum að Facebook hefði notað verktaka til að fara yfir hljóðupptökur sem teknar voru upp í gegnum skilaboðaforrit fyrirtækisins, Messenger.

„Persónuvernd hefur nú fengið þær upplýsingar frá persónuverndarstofnuninni á Írlandi (Data Protection Commission – DPC) að um sé að ræða hljóðupptökur frá um það bil 50 einstaklingum á Evrópska efnahagssvæðinu, þar af einum frá Íslandi, sem voru afritaðar handvirkt af Facebook Inc. þegar einstaklingur í Bandaríkjunum notaði umrædda þjónustu forritsins og átti í samskiptum við einstakling á Evrópska efnahagssvæðinu. Samkvæmt upplýsingum sem Persónuvernd hafa borist hefur verið slökkt á umræddum valmöguleika á meðan atvikið er til skoðunar.“

Í tilkynningu frá Persónuvernd kemur fram að þar sem ákvörðun um vinnsluna var ekki í höndum Facebook Ireland Ltd., sem hefur staðfestu á Írlandi, heldur móðurfyrirtækisins Facebook Inc., sem staðsett er í Bandaríkjunum, er samræmingarkerfi evrópsku persónuverndarreglugerðarinnar ekki virkjað og ber því persónuverndarstofnun hvers og eins ríkis innan EES, sem öryggisbresturinn nær til, ábyrgð á að fylgja málinu eftir.

„Í ljósi þeirra upplýsinga sem Persónuvernd hafa borist frá systurstofnun sinni á Írlandi hefur stofnunin ákveðið að hefja frumkvæðisathugun vegna þessa öryggisbrests hjá Facebook.“