Pétur Kiernan, háskólanemi í fjármálaverkfræði og frumkvöðull kynnir sér fasteigna- og leigumarkaðinn í þáttunum ÍBÚÐ sem unnir eru í samstarfi Útvarp 101 og Landsbankann.

Í þeim kynnir Pétur sér íbúðamál ungs fólks, kosti þess að leigja og kaupa, húsnæðissparnað og viðbótarlífeyrissparnað, sem sögð er ein hagstæðasta leiðin til að spara fyrir útborgun í fyrstu fasteign.

Í fyrsta þætti er spurningunni „Á ég að kaupa mér íbúð?“ varpað fram. „Ég bý enn heima hjá foreldrum mínum og er að huga að íbúðarkaupum. Ég fattaði að ég veit ekkert um viðbótarlífeyrissparnað og veit ekkert hvernig það tengist íbúðakaupum,“ segir Pétur.

Pétur spjallar við Ídu Pálsdóttur, starfsmann fataverslunarinnar Húrra Reykjavíkur, en hún hefur verið á leigumarkaði frá árinu 2017. „Maður er auðvitað alltaf að pæla og huga að íbúðakaupum en mig langar líka að flytja erlendis svo það er ekki hvetja mig í að fjárfesta í íbúð.“

Pétur spjallar einnig við parið Níels Thibaus Girerd og Sóleyju Guðmundsdóttur, en þau byrjuðu að búa í ágúst 2018 og leigja saman íbúðarhúsnæði á vegum byggingafélags námsmanna. „Ef við værum að leigja saman á svona staðsetningu, ekki á vegum Byggingarfélags námsmanna, þá þyrftum við líklega að vera fleiri leigja saman eins og fólk er mikið að gera í dag. Maður heyrir af fólki sem er að borga 100.000 krónur á manni í leigu, mér finnst það ótrúlega mikið,“ segir Sóley.

Pétur fer yfir kosti þess að kaupa eða leigja sér íbúð með hagfræðinginn Landsbankans, Ara Skúlason, sér innan handar.

Þáttaseríuna má nálgast í heild sinni á síðu Landsbankans.