Aðferðin er alltaf sú sama og skiptir engu hvort konur eru gangandi, hlaupandi eða hjólandi. Á eftir þeim kemur maður á gráu karlmannsreiðhjóli. Hann hjólar alveg upp að konunum og slær þær á rassinn og hjólar síðan á brott á fullri ferð.

Svona hefur þetta gengið fyrir sig síðan í desember í Esbjerg í Danmörku. Margar konur hafa lent í því að maðurinn hafi slegið þær á rassinn þegar þær hafa verið á ferð í og við miðbæinn. Lögregluna grunar að hér sé um einn og sama manninn að ræða í öllum málunum.

Eftir að lögreglan birti lýsingu á manninnum gáfu enn fleiri konur sig fram og sögðu frá hremmingum sínum og árásum mannsins.