Hasan Kizil elskar dýr, af öllum stærðum og gerðum. Hann hefur gert það að markmiði sínu að hjálpa dýrum og það gerir hann með því að smíða í sjálfboðavinnu stoðtæki fyrir þau.

„Dýr eru mér mikilvæg, þau eru sakleysislegustu skepnur á jörðinni,“ segir Kizil, „það sem ég geri fyrir þau er ekki mikið.“

Eftir að Kizil varð vitni að dauða kattar, þá ákvað hann að finna leið til að hjálpa dýrum. Hann hefur elskað að smíða síðan hann var drengur og hugsaði því af hverju hann væri ekki að hjálpa dýrum með því að smíða göngugrindur og stoðtæki fyrir dýr, sem hafa brotið sig.

Fyrsta stoðtækið smíðaði hann fyrir örn, og í raun bara úr rusli: vatnsröri og hlut úr þvottavél.
Hann byrjaði heima, en eftir að góðverk hans fóru að spyrjast út, ákvað verslunarmiðstöð í Tyrklandi að lána honum rými endurgjaldslaust fyrir aðstöðu hans.
Í fyrra hjálpaði Kizil 200 dýrum.
Á hverjum degi gerir hann 3-4 göngugrindur, en hann gerir þær allar í sjálfboðacinnu.
Fólk getur haft samband við Kizil í gegnum Instagram.

Kizil telur að ekkert veiti meiri gleði en fyrstu skrefin sem dýrin taka með aðstoð stoðtækja hans og gleði dýranna.