Það er alltaf gaman í góðra vin(kvenn)ahópi og það á svo sannarlega við um Jamie Bell, Auburn Salcedo og fimm vinkonur þeirra sem á hverju ári klæða sig upp í gervi frægs leikara á hrekkjavökunni.

Vinátta þeirra byrjaði fyrir átta árum síðan þegar þær voru ráðnar til vinnu á auglýsingastofu, segir Bell í viðtali við Bored Panda. „Yfirmaður okkar var alveg ómögulegur og andrúmsloftið var svo þrúgandi að við hættum allar á tveggja vikna tímabili og höfum verið bestu vinkonur síðan.

Fyrsti búningurinn var enginn hausverkur, heldur bara eitthvað sem gerðist hreinlega. „Við ofhugsuðum þetta ekkert, heldur fannst bara eðlilegt að vinkonuhópur myndi gera þetta.

Sama á við um valið á leikaranum hvert og eitt ár, það gerist bara mjög eðlilega. „Við gerum bara stutta skoðanakönnun daginn eftir Hrekkjavöku, hver á að vera næstum og eru fljótar að komast að hver er uppáhalds okkar allra.“

Þegar þær eru búnar að velja leikara, velja þær næst þá karaktera sem viðkomandi hefur leikið. „Við erum með plan fyrir næstu 25 ár hver fær að velja sinn karakter fyrst og svo koll af kolli. Við munum halda þessu áfram þar til við komumst í þáttinn til Ellen. Það gæti tekið áratugi!“

Segir Auburn marga hafa spurt um myndina frá 2015, „já ég er photo-shoppuð inn á hana. Ég var viðstödd myndatökuna í fullu gervi, andlitsmálning og allt, en ef satt skal segja þá var hún hræðileg. Börn fengu martraðir. Til að bjarga geðheilsu fólks, þá photoshoppaði ég mig inn á myndina án andlitsgervisins.“

2017 þá var vinkonuhópurinn staddur í fjórum borgum og því var ekki hægt að smella af hópmynd. „Við lofuðum því að það myndi aldrei gerast aftur!“