Miðjumaðurinn Matteo Guendouzi var eftirsóttur í sumar en hann skrifaði undir samning við Arsenal eftir viðræður við mörg félög.

Guendouzi er aðeins 19 ára gamall og er talinn mikið efni en hann var áður hjá Lorient í Frakklandi.

Guendouzi segist hafa rætt við fyrrum leikmann Arsenal, Jeremie Aliadiere en þeir voru saman hjá Lorient.

Aliadiere var hjá Arsenal í sjö ár frá 2001 til 2007 en hann lék alls 29 deildarleiki fyrir liðið.

Aliadiere var talinn gríðarlegt efni á sínum tíma en ferill hans náði aldrei þeim hæðum sem búist var við.

,,Það er rétt að það voru mörg lið sem sýndu mér áhuga. Ég ræddi við nokkur af stærstu félögum Evrópu,“ sagði Guendouzi.

,,Um leið og ég heyrði frá Arsenal þá var ákvörðunin mjög einföld og ég er ánægður með að vera kominn hingað.“

,,Ég ræddi við Jeremie um Arsenal og hann sagði mér að ég gæti bætt mig mikið hérna og lært af starfsfólkinu.“

,,Hann talaði alltaf mjög vel um liðið og sannfærði mig um að þetta væri rétt ákvörðun.“