Samstarf hverskonar hefur verið sérlega vinsælt hjá helstu stórfyrirtækjum heims síðustu árin og IKEA hafa ekki látið sitt eftir liggja í að mynda skemmtileg teymi. Nýjasta uppátæki þeirra er samvinna við virtu bresku klæðskerana hjá Savile Row en nú getur fólk dressað sig upp í stíl við húsgögnin!
Þetta er vægast sagt frumlegt hjá þessum sænsku sérfræðingum sem hingað til hafa haft alveg einstakt lag á að lokka okkur til að kaupa allskonar dót sem við höldum að við getum bara ekki verið án; servíettur, sprittkerti og ljósaseríur fyrir garðinn. Nauðsynlegt!
En jakkaföt í stíl við húsgögnin? Já, maður spyr sig.
Sá sem fengin var til að hanna þessi framandi dress heitir William Hunt en tilgangurinn mun vera að fagna persónulegum blæbrigðum þegar heimilið er fegrað. Akkúrat.
Og í þessum tilgangi hefur áðurnefndur William Hunt búið til fjórar gerðir af jakkafötum sem koma til með að fást í takmörkuðu upplagi.
Verkefninu mun hafa verið hleypt af stokkunum þegar kannanir leiddu í ljós að um sextán milljónir Breta (25 prósent) játuðu að hafa ekki kjark í að tjá eigin persónuleika og smekk inni á heimilum sínum. Þá mun fólk jafnframt hafa látið í ljós löngun til að skreyta heimilið með litum en ekki vitað hvernig best væri að bera sig að.
Nú er spurning hvort þessi herferð hjá IKEA muni hjálpa eitthvað til?
Myndir: Getty
