UEFA hefur kynnt stórar breytingar á undankeppni stórmóta sem munu taka gildi fyrir Heimsmeistaramótið árið 2030.

Nýja fyrirkomulagið á að draga úr leikjum þar sem stórþjóðir mæta mjög veikum andstæðingum, eins og England gegn San Marino eða Andorra, og gera undankeppnina meira spennandi fyrir stuðningsmenn.

Samkvæmt nýja kerfinu verður 36 sterkustu landsliðum Evrópu skipt í þrjá tólf liða riðla í svokallaðri „League 1“. Önnur landslið fara í „League 2“.

Liðin í efstu deildinni munu spila sex undankeppnisleiki gegn sex mismunandi andstæðingum, svipað og nýja fyrirkomulagið í Meistaradeild Evrópu. Tvö lið verða úr efsta styrkleikaflokki, tvö úr miðflokki og tvö úr neðri flokki.

Bestu þjóðirnar tryggja sér sjálfkrafa sæti á HM en önnur lið munu þurfa að fara í umspil.

UEFA hefur ekki enn staðfest hversu mörg lið fara beint áfram en kerfið verður endanlega samþykkt í september eftir frekari útfærslur.

Aleksander Ceferin forseti UEFA segir breytingarnar eiga að bæta samkeppnina og gera leikina áhugaverðari. „Nýja kerfið mun draga úr tilgangslausum leikjum og skapa meira jafnvægi,“ sagði Ceferin.

Heimsmeistaramótið 2030 verður haldið á Spáni, í Portúgal og Marokkó.