Takk fyrir túkall, er gamalt gott íslenskt orðatiltæki sem stundum er notað þegar einhver gerir eitthvað sem er ekki sérstaklega verðmætt eða gott. Ekki hvað síst ef það gegnur fram af fólki. Hagstjórnin hér á landi verðskuldar eitt gott: „Takk fyrir túkall”.

Þetta segir Elliði Vignisson, bæjarstjóri í Ölfusi, í pistli á heimasíðu sinni. Þar gerir hann stýrivaxtahækkun peningastefnunefndar Seðlabanka Íslands í morgun að umtalsefni, en eins og komið hefur fram hækkaði bankinn vexti um 0,25%. Eru stýrivextir, vextir á sjö daga bundnum innlánum, því 7,75%.

Sjá einnig: „Seðlabankinn má ekki standa einn í baráttunni“

Sitt sýnist hverjum um þessa hækkun en Elliði bendir á að fyrir suma hljómi þessi hækkun eins og lítið tæknilegt skref í hagstjórn.

„Fyrir íslensk heimili er þetta hins vegar mjög raunverulegt. Fyrir þau þýðir þetta að afborganir af húsnæðislánum hækkuðu um fimm- til sexþúsund milljónir á ári. Fimm til sex þúsund milljónir teknar úr vösum fjölskyldna, ungs fólks og þeirra sem eru að reyna að halda heimilisbókhaldinu saman,“ segir Elliði.

Sjá einnig: Halla segir tvennt vera sláandi við stýrivaxtahækkunina – „Hún er orðin aðkallandi spurningin“

Hann segir í pistli sínum að ákvarðanir Seðlabankans séu afleiðing hagstjórnarinnar.

„Ríkisstjórn sem heldur áfram að dæla eldsneyti á hagkerfið með auknum útgjöldum og þenslu gerir bankanum erfiðara fyrir að ná niður verðbólgu án vaxtahækkana. Seðlabankinn er hitamælirinn í pottinum sem hið opinbera kyndir undir,“ segir hann.

Elliði segir að á meðan hið opinbera heldur áfram að þenja út kerfið án þess að stuðla að verðmætasköpun sitji heimilin og fyrirtækin eftir með reikninginn.

„Auknar álögur auka skaðann. Fyrir þau eru þetta ekki skýrslur eða glærukynningar. Þetta eru hærri afborganir, minni ráðstöfunartekjur og aukið álag á venjulegt fólk. Þetta eru minni lífsgæði og skert framtíð barna okkar. Það er þess vegna sem ábyrg hagstjórn skiptir máli. Þegar stjórnvöld missa taktinn borga heimilin verðið.“