Þingmenn Repúblikana streyma nú að útganginum í fulltrúadeild Bandaríkjaþings og þegar sú staða er uppi, er það yfirleitt ávísun á vond tíðindi fyrir sitjandi forseta.

Slæmt gegni í skoðanakönnunum, hver ósigurinn á fætur öðrum í staðarkosningum, himinhátt bensínverð. Öll aðvörunarljós blikka hvað varðar gengi Repúblikana í þingkosningunum í nóvember næstkomandi.

Nú getur Donald Trump bætt flótta sitjandi þingmanna við listann yfir áhyggjuefnin. Sögulegur fjöldi þingmanna Repúblikana sækist ekki eftir endurkjöri í nóvember. Þetta kemur fram í umfjöllun CNN og New York Times.

Að minnsta kosti 36 Repúblikanar hafa tilkynnt að þeir sækist ekki eftir endurkjöri í nóvember en þá verður kosið um öll sætin í fulltrúadeildinni.

„Repúblikanarnir í fulltrúadeildinni hlaupa hraðar að útganginum en börn á síðasta skóladegi,“ sagði Harry Enten, blaðamaður og greinandi hjá CNN, þegar hann fjallaði um tölurnar nýlega.

Úttekt CNN sýnir að sá flokkur, sem hefur flesta þingmenn sem sækjast eftir endurkjöri, hefur fengið meirihluta í fulltrúadeildinni í fjórum af hverjum fimm kosningum síðustu 40 árin.

Sú þróun sem á sér nú stað í þingliði Repúblikana bendir til að þingmennirnir hyggist finna sér aðra vinnu frekar en að þurfa að sitja í minnihluta í heilt kjörtímabil segir í umfjöllun New York Times.