Mesta manntal sögunnar hófst nýlega í Indlandi og mun standa yfir næsta árið eða svo. Manntal var síðast gert þar 2011 og reyndust landsmenn þá vera 1.21 milljarður en nú er reiknað með að þeir séu orðnir 1.4 milljarðar og þar með verður Indland opinberlega fjölmennasta ríki heims.

Ætlunin var að gera manntal 2021 en því var frestað vegna heimsfaraldurs kórónuveirunnar.

Starfsfólk manntalsins mun eyða um mánuði á hverju svæði landsins við að afla upplýsinga um íbúa þess, heimili þeirra, lífshætti og fleira.

Rúmlega 3 milljónir opinberra starfsmanna munu koma að gerð manntalsins en í manntalinu 2011 komu 2.7 milljónir opinberra starfsmanna við sögu.