Þegar rætt er um þyngdartap, þá er oft talað um að borða minna og hreyfa sig meira. En samkvæmt því sem segir í umfjöllun Harvard Health Publishing, þá sýnir ný rannsókn að svefn skiptir mjög miklu máli varðandi hversu mikið við borðum.

Margir ná ekki sjö til níu klukkustunda svefni á nóttu eins og mælt er með. Þetta hefur verið tengt við aukna hættu á meðal annars hjartasjúkdómum, of háum blóðþrýstingi, sykursýki og ofþyngd.

Svefn er einnig mikilvægur varðandi andlega og líkamlega heilsu okkar.

Í rannsókn, sem var birt í vísindaritinu JAMA Internal Medicine, beindu vísindamenn sjónum sínum að 80 manns, á aldrinum 21 til 40 ára, sem var allt of þungt. Fólkið svaf yfirleitt skemur en 6,5 klukkustundir á nóttu.

Í tvær vikur var helmingur þeirra hvattur til að lengja svefninn í 8,5 klukkustundir en hinir héldu óbreyttum svefnvenjum. Fólkið mátti ekki breyta matarvenjum eða hreyfingu.

Svefninn var mældur með búnaði sem var settur á úlnlið og vísindamennirnir mældu einnig hitaeininganeysluna og orkunotkun.

Vísindamennirnir segja að hópurinn, sem var hvattur til að sofa lengur,  hafi að meðaltalið sofið einni klukkustund lengur á nóttu. Fólkið í honum hafi að meðaltali borðað 270 færri hitaeiningar á dag og lést um hálft kíló. Fólkið í hinum hópnum þyngdist að meðaltali um tæpt hálft kíló.

Harvard Health Publishing segir að svefn hafi áhrif á hormón sem stýra hungri og mettunartilfinningu. Of lítill svefn getur aukið matarlystina og gert fólki erfiðara fyrir við að finnast það vera mett.