„Íransstjórn hefur ítrekað sýnt að hún beitir hryðjuverkum utan eigin landamæra,“ segir þingmaðurinn Marc Henrichmann í samtali við dagblaðið Süddeutsche Zeitung.
Henrichmann er formaður þingnefndar sem hefur eftirlit með leyniþjónustustofnunun Þýskalands. Hann segir að ekki sé hægt að útiloka hefndaraðgerðir, þar á meðal af hálfu íranska hryðjuverkahópa sem liggja í dvala (e. sleeper cells) í Evrópu.
Átökin í Mið-Austurlöndum hafa harðnað mjög síðustu daga og hafa Íranir gert hefndarárásir meðal annars í Dúbaí, Kúvæt, Katar, Sádi-Arabíu og á breska herstöð á Kýpur.
Breska blaðið Daily Mail varpaði í dag ljósi á vopnabúr íranska hersins, en herinn býr yfir langdrægum eldflaugum sem geta flogið allt að þrjú þúsund kílómetra.
Hættulegasta eldflaugin í vopnabúri þeirra heitir Khorramshahr 4, en samkvæmt bandarísku hugveitunni Foundation for Defence of Democracies hefur hún 2.000 til 3.000 kílómetra drægni og getur borið sprengjuodd sem vegur eitt og hálft tonn.
Ef hún yrði notuð gæti hún náð til stórs hluta Evrópu, þar á meðal Grikklands, Ítalíu, Þýskalands, Póllands, Danmerkur og Svíþjóðar. Árásin á bresku herstöðina í Kýpur sýnir að yfirvöld í Íran veigra sér ekki við að ráðast á önnur ríki, jafnvel þó þau hafi enga beina aðkomu að átökunum.
Það eru ekki bara Þjóðverjar sem hafa áhyggjur af hryðjuverkahópum því John Healey, varnarmálaráðherra Bretlands, sagði í gær að hætta væri á „vaxandi og handahófskenndum hefndaraðgerðum Írans“ og átti þar við hryðjuverkaárásir.
Breska leyniþjónustan, MI5, hefur áður varað við því að einstaklingar hliðhollir írönskum yfirvöldum hafi ítrekað reynt að framkvæma hryðjuverk í Bretlandi á síðustu tólf mánuðum.
Colin Clarke, framkvæmdastjóri Soufan Centre, bandarískrar hugveitu á sviði leyniþjónustu og öryggismála, segist reikna með að Íranir beiti öllum tiltækum ráðum til að valda sem mestum skaða.
„Fyrir Íran er þetta stríð spurning um tilvist. Vegna þess myndi ég fyllilega búast við að yfirvöld í Teheran virki þá hryðjuverkahópa sem liggja í dvala á Vesturlöndum til að gera hlutina sársaukafulla fyrir Bandaríkin og Ísrael. Hezbollah og aðrir tengdir aðilar gætu vel reynt að fremja árásir í Evrópu og Norður-Ameríku.“
