Í umfjöllun HuffPost um málið kemur fram að sérfræðingar bendi á að það þurfi bara að gera smávegis breytingu á morgunrútínunni til að hafa áhrif á hvernig restin af deginum verður.
Fyrsta breytingin er að tengja nýjan hollan vana við rútínu sem maður hefur nú þegar. Murray Zucker, sálfræðingur, sagði að lykillinn sé að byrja með einn einfaldan vana og binda hann við eitthvað vel þekkt. „Maður tengir vanan við rútínu, byrjar hægt og byggir þetta upp hægt og rólega,“ sagði hann og lagði áherslu á endurtekning og staðfesta séu lykilatriði í þessu samhengi.
Annað ráð er að fjarlægja símann úr svefnherberginu. Allison Task, markþjálfi, sagði þetta vera ófrávíkjanlega kröfu hennar þegar hún vinnur með fólki. Hún segir að með þessu fái umheimurinn tækifæri til að stýra skapinu frá fyrstu morgunstund. Rannsóknir hafa þess utan tengt notkun samfélagsmiðla og mikinn fjölda tölvupósta við minni vellíðan. Þá getur skjánotkun truflað svefninn.
Zucker benti á að einnig sé mikilvægt að breyta því hvernig maður talar við sjálfan sig, margir tali neikvætt við sjálfa sig og það gerist aðallega á morgnana. Hann ráðleggur fólki að nota einfalda tækni til að breyta þessu, að nota sitt eigið nafn. „Ef þú notar nafnið þitt í einræðu þinni, hefur þú frekar tilhneigingu til að fylgja eigin ráði,“ sagði hann.
Hann sagði einnig að mikilvægt sé að eiga í samskiptum við annað fólk og að þau samskipti megi gjarnan hefjast strax að morgni. „Myndaðu tengsl við manneskju sem þú berð hlýjan hug til,“ sagði hann.
Margir sérfræðingar benda einnig á mikilvægi þess að fólk einblíni á það sem það er þakklátt fyrir. Rannsóknir hafa sýnt að fólk, sem gerir það, fær mörg stig þegar mat er lagt á hversu vel það þrífst og hversu hamingjusamt það er.
