Margir gæludýraeigendur leyfa dýrinu sínu að sofa upp í rúmi hjá þeim og er þetta einfaldlega hluti af hversdagslífinu enda getur verið ansi notalegt og róandi að vakna við kött, sem teygir sig, eða þegar hundur leggur fót sinn á bringu eigandans.
Fyrir þá sem líta á gæludýr sem hluta af fjölskyldunni, þá er það ekki bara vani að leyfa dýrinu að sofa upp í rúmi, það er einnig uppspretta öryggis og nærveru.
En þrátt fyrir að þessi notalega venja geti haft áhrif á tilfinningalega vellíðan fólks, þá telja sumir sérfræðingar að þetta sé ekki alltaf gott.
Pablo Antonio Olmedo, dýralæknir, segir að það að sofa með hund eða kött upp í rúmi geti dregið úr stressi og kvíða, bætt svefninn og styrkt tilfinningaleg tengsl.
Daily Record skýrir frá þessu og segir að Olmedo segi að rólegur andardráttur dýrsins, líkamshitinn og návistin hafi róandi áhrif sem minni jafnvel á faðmlag. Þetta getur einnig aukið magn oxýtóníns, sem er hið svokallaða „hamingjuhormón“, og dregið úr magni kortísóns, sem tengist stressi. Olmedo segir að þetta geti bætt skapið og gert fólki auðveldara fyrir við að sofna.
Rannsókn vísindamanna við Washington State University sýndi að tíu mínútna nærvera við hund eða kött getur minnkað magn kortísóls mjög mikið. Þessi líkamlegu viðbrögð geta skýrt af hverju samvera með dýrum getur virkað afslappandi og uppbyggileg.
Margir gæludýraeigendur segja að þeir séu í betra skapi þegar þeir vakna og finni síður fyrir einkennum þunglyndis.
En þetta er ekki alveg gallalaust því American Academy of Sleep Medicine segir að um þriðjungur þeirra sem sofa með gæludýr upp í hjá sér, upplifi svefntruflanir. Dýrin eru með sinn eiginn svefnrytma, hreyfa sig, gefa frá sér hljóð eða vakna snemma og þetta getur allt haft áhrif á svefngæði fólks.
Þess utan getur ákveðin heilsufarslega áhætta falist í því að láta dýrin sofa upp í hjá sér. Dýrin geta borið sníkjudýr, bakteríur eða ofnæmisvalda með sér, sérstaklega ef þau eru óbólusett og fara ekki reglulega í ormahreinsun. Fólk með ofnæmi eða astma getur einnig orðið fyrir óþægindum af völdum dýrahára í sængurfatnaðinum.
