Því er velt upp í fjölmiðlum í Bretlandi hvort hinn alræmdi og afar umdeildi hægriöfgamaður Tommy Robinson og leik- og tónlistarkonan Holly Valance, sem einna frægust er fyrir hlutverk sitt í sápuóperunni Nágrannar, eigi í ástarsambandi en þau hafa sést mikið saman að undanförnu og myndir hafa verið birtar af þeim.
Holly Valance, sem er 42 ára, fór með hlutverk táningsstúlkunnar Felicity Scully í áströlsku sápuóperunni Nágrönnum á árunum 1999-2002. Hún hélt áfram eftir það í leiklist en sneri sér einnig að tónlist og komst ofarlega á vinsældalista með nokkur lög. Einna mesta athygli vakti hún fyrir lagið Kiss Kiss en í myndbandi við það fækkaði Valance fötum og var í hluta myndbandsins við lagið nakin en skær ljós huldu brjóst hennar og kynfæri.
Valance er áströlsk en hefur búið í Bretlandi í á annan áratug og er með breskan ríkisborgararétt. Hún hefur lítið sinnt leiklist og tónlist síðustu ár.
Tommy Robinson, sem er einu ári eldri en Valance, er mjög þekktur í Bretlandi og er langt til hægri á hinum pólitíska ás en misjafnt er eflaust eftir pólitískum skoðunum fólks hvort kalla megi hann öfgamann. Hann hefur mótmælt harðlega komu innflytjenda til Bretlands og þá sérstaklega múslima. Robinson gerir mikið út á þjóðernisstefnu og hefur verið sakaður um aðhyllast hugmyndir um að hvítt fólk sé æðra fólki af öðrum kynþáttum. Hann hefur hlotið dóma fyrir ýmis lögbrot.
Holly Valance er einnig töluvert til hægri en fyrrum eiginmaður hennar Nick Candy er gjaldkeri hægri popúlista flokksins Umbót (e. Reform) en Valance þekkir leiðtoga flokksins hinn umdeilda Nigel Farage einnig vel.
Daily Mail birtir myndir af Holly Valance og Tommy Robinson sem teknar voru í einkalestarferð sem þau fóru í með fyrrum leikaranum Laurence Fox, sem er á sams konar línu og þau í stjórnmálum, og konu hans, Elizabeth. Fox birti myndirnar á samfélagsmiðlum. Lestin er í eigu Jeremy Hosking sem er kaupsýslumaður og hefur gefið stjórnmálaflokki, The Reclaim Party, sem Fox leiðir, peninga.
Fram kemur að vinir Valance hafi áhyggjur af því að dætur hennar, 12 og 8 ára gamlar, séu að eyða tíma með Robinson. Hann hefur hlotið dóma fyrir fjársvik, líkamsárás, að nota fölsuð skilríki og vanvirðingu við réttinn. Vinir Valance segja að hvort sem þau eigi í ástarsambandi eða ekki sé það samt áhyggjuefni að hún sé í samskiptum við margdæmdan glæpamann.
Valance tók virkan þátt í fjölmennum mótmælafundi sem Robinson átti mikin þátt í að skipuleggja, í september þar sem mótmælt var einna helst komu flóttamanna og hælisleitenda til Bretlands og eftir fundinn lofaði hún Robinson í hástert. Við þetta tækifæri voru teknar myndir af þeim saman. Vinir Valance segja að undanfarið hafi hún orðið enn hægri sinnaðri og sé farin að sökkva sér í auknum mæli ofan í samsæriskenningar. Hvort samband hennar við Tommy Robinson hafi eitthvað haft um það segja er óneitanlega eitthvað sem vinir hennar og aðrir spyrja sig nú.
