Vigdís Jakobsdóttir hefur verið ráðin verkefna – og viðburðastjóri menningarmála í Kópavogi.

Vigdís á að baki glæstan feril í menningarstjórnun hérlendis en hún var listrænn stjórnandi Listahátíðar í Reykjavík á árunum 2016-2024. Hún situr í stjórnum Þjóðleikhúsráðs, Miðstöðvar barnamenningar, Sviðslistamiðstöðvar og Listaháskólans og  hefur auk þess sinnt fjölbreyttum störfum er snúa að list og menningu undanfarin ár bæði hérlendis og erlendis.

Vigdís lærði leikstjórn við Háskólann í Kent í Canterbury og er með diplómu í kennslufræði fyrir háskólakennara frá HÍ.

„Það er stórkostlegur fengur fyrir menningarlífið í Kópavogi að fá jafn reynslumikinn stjórnanda í starf verkefna- og viðburðastjóra menningarmála í Kópavogi og Vigdísi Jakobsdóttur. Reynsla hennar og þekking á eftir að setja svip á menningarlíf bæjarins og hún mun smellpassa í þann öfluga hóp forstöðumanna og starfsmanna menningarmála sem nú er þar fyrir,“ segir Soffía Karlsdóttir forstöðumaður menningarmála í Kópavogi.

Mikill áhugi var á starfinu en alls sóttu 113 um stöðuna.

Vigdís segist afar þakklát fyrir að fá tækifæri til að starfa að menningarmálum í Kópavogi. „Að auka aðgengi að listum og menningu fyrir sem fjölbreyttasta hópa samfélagsins er mér hjartans mál. Ég hef fylgst af aðdáun með þeirri öflugu uppbyggingu sem átt hefur sér stað í menningarlífi Kópavogs á undanförnum árum og hlakka til að vinna með því frábæra fagfólki sem starfar í menningarhúsum bæjarins.“

Vigdís hefur störf 1. september.