Þetta er niðurstaða nýrrar rannsóknar, sem var birt í vísindaritinu Geophysical Research Letters í síðustu viku. Rannsóknin hefur ekki verið ritrýnd.
Rétt er að hafa í huga að mjög litlar líkur eru á að AMOC-hafstraumurinn hrynji en ef það gerist þá getur það haft í för með sér að veturnir verða mjög kaldir í Norður-Evrópu.
AMOC stendur fyrir „Atlantic Meridional Overturning Circulation“ og sér um að flytja kaldan sjó í hlýrri sjó djúpt niðri í hafinu og hlýjan sjó norður eftir við yfirborð sjávar. Hitamunur og saltmagn knýja strauminn áfram.
AMOC gegnir lykilhlutverki þegar kemur að því að hafa stjórn á loftslaginu á heimsvísu og sér meðal annars til þess að veturnir í Norður-Evrópu séu mildir.
En eftir því sem hitastig á heimsvísu hækkar, þá mun ísinn á Grænlandi bráðna sífellt hraðar og úrkoman yfir hafi mun aukast. Þannig blandast sífellt meira ferskvatn við sjóinn í norðanverðu Atlantshafi.
Eftir því sem magn ferskvatns eykst, minnkar massi sjávar. Ef ferskvatnið er ekki nægilega þungt til að sökkva niður, þá getur það veikt eða stöðvað hafstrauminn.
TV2 hefur eftir Susanne Ditlevsen, prófessor í tölfræði við Kaupmannahafnarháskóla, að köldustu vetrardagarnir verði 10-20 gráðum kaldari en ef AMOC hrynur ekki. Það má eiga von á svo mikilli kólnun allt að því árlega þegar búið er að taka tillit til hnattrænnar hlýnunar.
Miðað við niðurstöðurnar getur AMOC veikst um rúmlega 80% ef hnattræn hlýnun verður tvær gráður.
Ef svo fer, þá gæti mesta frostið að vetri til orðið allt að 45,7 gráður í Reykjavík og svo mikið frost gæti orðið á tíu ára fresti að meðaltali.
Það myndi frjósa í að meðaltali 323 daga á ári í Reykjavík og 274 sólarhringa á ári myndi hitastigið ekki komast upp fyrir frostmark.
Það eina jákvæða í öllu þessu er að ef AMOC hrynur, þá verða kuldatölur af þessu tagi ekki að veruleika fyrr en 100 árum síðar, svo við núlifandi þurfum ekki að hafa miklar áhyggjur en öðru máli gegnir um afkomendur okkar.
