Arnar Gunnlaugsson, þjálfari íslenska karlalandsliðsins, valdi hóp fyrir komandi vináttuleiki gegn Skotum og Norður-Írum ytra í næsta mánuði í dag. Hann ræddi við 433.is í kjölfarið.
Ísland spilaði sína fyrstu leiki undir stjórn Arnars gegn Kósóvó í Þjóðadeildinni í mars. Fór það ekki vel og tapaði Ísland samtals 5-2 og féll niður í C-deild keppninnar.
„Það var mjög erfitt. Vanalega færðu góðan tíma með þínum leikmönnum til að skoða hvað fór úrskeiðis. Þú vilt það til að það verði framfarir á sem skemmstum tíma. Það er erfitt að tapa leikjum en við lítum á það jákvæða og tökum það með okkur inn í næsta glugga,“ sagði Arnar í Laugardalnum í dag.
Leikmenn þurftu að læra nýja hluti og læra þá hratt eftir að Arnar tók við og allt snýst þetta um að hafa liðið klárt fyrir undankeppni HM í haust.
„Við erum að breyta leikstílnum allverulega. Við erum að fara þá leið að geta verið aðeins meira með boltann en að sama skapi þurfum við að verjast eins og lið. Þetta er tækifæri til að stíga aðeins stærra skref. Ég hef aldrei falið þá staðreynd að það er erfitt að tapa leikjum. Ef við þurftum að byrja einhvers staðar var það í þessum Kósóvó leikjum. Fórnin var ansi stór, sambandið varð af góðum tekjum og við töpuðum tveimur landsleikjum, ég er ekki að gera þetta að gamni mínu.“
Ítarlegt viðtal við Arnar er í spilaranum.
Meira
Nýr landsliðshópur Arnars vekur athygli: Anton Ari fær kallið – Albert og Aron Einar með
