Casemiro er sagður vera á leið til Inter Miami eftir að hafa náð samkomulagi um persónulega samningsskilmála við félagið samkvæmt erlendum miðlum.

Brasilíski miðjumaðurinn hjá Manchester United hefur að sögn mikinn áhuga á að flytja til Miami ásamt fjölskyldu sinni og er einnig spenntur fyrir möguleikanum á að spila með Lionel Messi hjá félaginu sem David Beckham á hlut í.

Það er þó enn ákveðin flækja í málinu þar sem LA Galaxy á svokallað „discovery rights“ á Casemiro í MLS-deildinni. Inter Miami þarf því líklega að greiða Galaxy bætur til að fá réttinn til að semja við leikmanninn.

Casemiro hefur jafnframt verið tilbúinn að lækka launakröfur sínar til að samningurinn geti gengið upp innan reglna MLS-deildarinnar. Inter Miami er sem stendur ekki með laust sæti fyrir sérstakan hálaunaleikmann og því gæti samningur Casemiro verið lægri fyrsta árið nema einhver af stórstjörnum liðsins fari.

Hinn 34 ára gamli miðjumaður tilkynnti í janúar að hann myndi yfirgefa Manchester United eftir tímabilið. Þrátt fyrir það átti hann sterkan lokakafla undir stjórn Michael Carrick og margir stuðningsmenn vildu sjá hann vera áfram hjá félaginu.

Manchester United hyggst nú styrkja miðjuna í sumar og hefur verið orðað við leikmenn á borð við Ederson hjá Atalanta og Mateus Fernandes hjá West Ham.