Ljóst er að þeir Heiðar Helguson og Ingi Rafn ingibergsson verða aðstoðarmenn Bjarna Jóhannssonar hjá Selfossi í 2. deild karla.

Þetta staðfesti félagið í dag en Bjarni var ráðinn þjálfari liðsins á dögunum og á að koma liðinu upp í Lengjudeildina á ný.

Heiðar er er nafn sem allir kannast við en hann er fyrrum landsliðsmaður og lék lengi sem atvinnumaður á Englandi.

Ingi Rafn er að sinna sama starfi og hann gerði í sumar en hann var aðstoðarþjálfari liðsins í Lengjudeildinni á síðustu leiktíð.

Tilkynning Selfoss:

Heiðar Helguson og Ingi Rafn Ingibergsson hafa verið ráðnir sem aðstoðarþjálfarar meistaraflokks karla. Þeir munu því starfa við hlið Bjarna Jóhannssonar, nýráðnum þjálfara liðsins.

Heiðar Helguson er öllum knattspyrnuáhugamönnum kunnugur. Hann á að baki fimmtán ára reynslu sem atvinnumaður í knattspyrnu en lengst af spilaði hann á Englandi. Lengst var hann hjá Watford en þar lék hann 174 leiki og skoraði í þeim 55 mörk.
Þar að auki spilaði hann fyrir Fulham, QPR, Cardiff og Lilleström. Hann á að baki 55 landsleiki og tólf mörk í þeim. Þjálfaraferill Heiðars er nú þegar hafinn en hann var aðstoðarþjálfari Kórdrengja tímabilin 2021-2022.

Ingi Rafn Ingibergsson er Selfyssingum vel kunnugur en hann var aðstoðarþjálfari liðsins í sumar. Ingi á einnig langan knattspyrnuferil að baki en hann á tæplega 500 mótsleiki að baki í íslenskri deildarkeppni. Ingi hefur undanfarin ár þjálfað yngri flokka á Selfossi og þekkir allt starf hjá knattspyrnudeildinni út og inn.

Knattspyrnudeild Selfoss bindur miklar vonir við að hæfni og áratugareynsla þessa fyrrum leikmanna muni nýtast knattspyrnudeild Selfoss vel á næstu árum í þeirri uppbyggingu sem framundan er.