FH er í níunda sæti Bestu deildar karla, tveimur stigum frá fallsæti, þegar þrettán umferðum er lokið. Liðið tapaði 0-3 gegn Víkingi Reykjavík á heimavelli um helgina.
Fimleikafélagið var til umræðu í hlaðvarpsþættinum Dr. Football í gærkvöldi. Þar sagði Hrafnkell Freyr Ágústsson til að mynda að FH þurfi að endurskoða flest allt.
„FH þarf að endurstilla sig gjörsamlega. Þeir hafa allt of lengi verið að reyna að vera á toppnum með enga innistæðu. Þeir taka endalaust yfirdrátt á kortið sitt, reyna að halda í vini sína sem eiga nóg af peningum en það bara gengur ekki. Þið verðið að fara að safna pening og byggja ykkur upp á nýtt,“ segir Hrafnkell.
FH lét Ólaf Jóhannesson fara fyrr í sumar og réði Eið Smára Guðjohnsen. Það er hins vegar ekki nóg að sögn Alberts Brynjars Ingasonar.
„Það kemur mér ekkert á óvart að úrslitin hafi ekki fylgt eftir því að hafa breytt um þjálfara. Það sáu það allir sem hafa horft á FH í suma að vandinn var ekkert þjálfarinn. Vandamálið er hvernig þessi hópur er settur saman, einhverjir 7-8 miðjumenn í byrjunarliðinu í hverjum leik,“ segir Albert.
„Þetta er bara hræðilegt,“ bætti Hrafnkell við.
