Grænkerar, sem borða vegan fæði án nokkurra dýraafurða, eru frá vinnu í að meðaltali fimm daga á ári vegna veikinda samkvæmt nýrri, breskri könnun. Þeir sem eru ekki vegan eru hins vegar að meðaltali aðeins tvo og hálfan dag frá vinnu á ári vegna veikinda.

Sagt er frá könnuninni á vef Metro. Þátttakendur í könnuninni voru þúsund talsins, allt vinnandi fólk í Bretlandi. Í niðurstöðum hennar kemur einnig fram að grænkerar eru þrisvar sinnum líklegri til að fara til heimilislæknis en þeir sem eru ekki vegan.

Þegar að flesnutímabilið ríður yfir fara grænkerar 2.6 sinnum til læknis. Aðrir fara að meðatali 0.7 sinnum til læknis á þessu tímabili. Þá fer ungt fólk oftar til læknis en eldra fólk samkvæmt niðurstöðum.

Næringarfræðingurinn Heather Russell hjá góðgerðarsamtökunum The Vegan Society segir algjörlega mögulegt að fá öll nauðsynleg næringarefni úr vegan mataræði og að grænkerafæði hafi afar jákvæð áhrif á líkamann.

„Rannsóknir hafa sýnt að fæðið geti lækkað blóðþrýsting og kólestóról og minnkað hættu á hjartasjúkdómum, sykursýki og einhverjum tegundum af krabbameini.“