Andri Ólafsson tekinn við af Fanneyju Birnu
Andri Ólafsson hefur tekið við sem aðstoðarritstjóri Fréttablaðsins, samkvæmt upplýsingum DV. Hann var áður fréttastjóri en hefur gegnt stöðu ritstjóra Íslands í dag síðastliðið ár. Þátturinn hefur nú verið lagður niður. Fanney Birna Jónsdóttir sagði upp sem aðstoðarritstjóri á dögunum en megn óánægja ríkti innan fjölmiðlasamsteypunnar eftir að Pjetri Sigurðssyni var sagt upp störfum. Hann hafði kvartað undan einelti af hálfu Kristínar Þorsteinsdóttur, aðalritstjóra 365.
Mannauðsstjórinn sem hóf athugun á meintu einelti var einnig látinn fara. Starfsmenn mótmæltu uppsögn Pjeturs harðlega í tilkynningu en fram hefur komið að Jón Hákon Halldórsson, sá sem sendi yfirlýsinguna, var fyrir vikið kallaður á teppið hjá eigendum miðilsins.