Ísraelsmenn hafa kallað sendiherra Spánar í landinu á teppið eftir að sjö metra hátt líkneski af Benjamin Netanyahu, forsætisráðherra landsins, var sprengt í loft upp á hátíð í suðurhluta Spánar um páskana.

Atvikið átti sér stað í bænum El Burgo nærri Malaga 5. apríl, og var 14 kílóum af púðri komið fyrir í líkneskinu áður en það var sprengt í tætlur.

Um er að ræða gamla hefð í bænum og hafa sambærileg líkneski af öðrum þekktum einstaklingum, þar á meðal Donald Trump og Vladimír Pútín, áður verið notuð.

Ísraelsmönnum var ekki hlátur í huga og sakaði ísraelska utanríkisráðuneytið spænsk stjórnvöld um að ala á gyðingahatri. Þá var atvikið endurspegla „kerfisbundna hatursáróðursstefnu“ ríkisstjórnar Pedro Sánchez forsætisráðherra.

Spænska utanríkisráðuneytið hafnaði ásökununum alfarið. Í yfirlýsingu sagði ráðuneytið stjórnvöld „staðráðin í að berjast gegn gyðingahatri og hvers kyns hatri eða mismunun“ og var öllum ásökunum um hið gagnstæða vísað á bug.

Grunnt hefur verið á því góða undanfarin misseri á milli yfirvalda á Spáni annars vegar og Ísrael hins vegar. Spænsk stjórnvöld hafa ítrekað gagnrýnt hernaðaraðgerðir Ísraels sem og loftárásir ísraelska hersins á Líbanon. Þá er skemmst að minnast ákvörðunar spænska sjónvarpsins um að sniðganga Eurovision-söngvakeppnina vegna þátttöku Ísraels.