Munurinn á hæsta og lægsta hitanum var 90,3 gráður. Þar með féll gamla metið en það var sett í Bandaríkjunum í janúar 1954.
Í norðvesturhluta landsins er stærsta hérað þess, Xinjiang. Þar er fólk vant köldum vetrum en sem betur fer er álíka kuldi og var á sunnudaginn ekki daglegt brauð. Að morgni til mældist frostið 52,3 gráður. Þetta jafnar kuldametið fyrir febrúar í Kína og er raunar ekki langt frá mesta frostinu sem mælst hefur í landinu en það er 53 gráður og mældist í janúar á síðasta ári.
Það var öllu hlýrra í sunnanverðu landinu, í um 2.500 km fjarlægð, því í suðurhluta Guizhou-héraðsins fór hitinn upp í 38 gráður síðdegis. Venjulega er hitinn þar á þessum árstíma á bilinu 10 til 15 gráður. Mjög hlýtt hefur verið í héraðinu og fleiri héruðum að undanförnu og hefur hitinn farið yfir 33 gráður víða.
Það kemur svo sem ekki á óvart að það sé mikill hitamunur í þessu stóra landi en það eru tæplega 4.000 km á milli norður- og suðurhlutans. En 90 gráðu munur er ekki daglegt brauð.